Småbruk 2011

I førre veke vart det arrangert konkurransa "Småbruk 2011" med deltakarar frå 5. og 6.steg på Lalm oppvekstsenter. Det var Jo Ivar og Tove Kleiven som stilte opp som programledarar, dommarar og mentorar på småbruket sitt.

Fyrst fekk elevane ei omvisning på garden der dei fekk fortalt mykje om gardsdrift og dyrehald. Det var viktig å følgje godt med, sidan kunnskapen her var viktig å ha med seg i kunnskapskonkurransa seinare. Elevane skulle også undervegs ta bilete av dyr på garden, gardsglede, gardsarbeid og reiskap på garden. (Fotograf: Iselin Dahlen, 5.klasse)

Seinare vart det klart for konkurranse. Elevane vart delte inn i fire grupper, og konkurrerte i greinene mjølkespannhalding, slegge, saging, tautrekking og hesteskokasting. Det heile vart avgjort i ei kunnskapskonkurranse der det til slutt vart kåra eit vinnarlag etter ei spanande konkurranse. (Fotograf: Anders Engebretsen, 5.klasse)
(Fotograf: Ida Bjørkheim, 6.klasse)


(Fotograf: Frank Kvålshagen, 6.klasse)

Så vart det superfinale mellom dei fire på vinnarlaget. Det endte med at Iselin Dahlen gjekk seirande ut av konkurransa. Ho fekk sjølvsagt ei stor plate mjølkesjokolade i premie. (Stolt vinnar av "Småbruk 2011)

Elevar og tilsette hadde ein fantastisk dag. Tusen takk til fantastiske føresette som stiller opp med slike fantastiske opplegg!

Flytur i Sjårdalen med Stade og Toefte Airways

I førre veke var Sjårdalen oppvekstsenter på flytur. Dei reiste nesten jorda rundt i Stade og Toefte Airways. Elevane reiste fyrst til Svalbard, der dei fekk vera med på scootertur og gruvetur. Deretter tok dei turen sørover til Svartehavskysten. Der fekk dei gå i gamlebyen Nessebar.

Etterpå gjekk turen til Roma i Italia. Der måtte elevane sjølvsagt besøke Colosseum og Peterskyrkja.

Den lengste reisa var likevel over Atlanterhavet til USA. For fyrste gong i elevane sine liv fekk dei vera med i ein traktor med trippelhjul. Dei fekk
også oppleva indianarar, og sjå korleis kulturen deira var.
På heimreisa serverte kabinpersonalet forfriskningar, og kapteinen fekk passasjerane trygt ned på jorda att i Noreg.

Statsminister Jens Stoltenberg besøkte Vågå

Jens Stoltenberg var onsdag 18.mai i Vågå for å opne Vågåmo skule og få høyre meir om skule- og samfunnsutviklingsarbeidet i Vågå. Han fekk mellom anna oppleve song, dans og fekk demonstrert nye digitale verktøy i 3.klasse.
Her signerer Jens Stoltenberg ei glassplate til Vågåmo skule

Jens Stoltenberg er full av lovord om Vågå kommune og ordførar Rune Øygard. Han fortel at det alltid er nye prosjekt i Vågå og alltid noko som skjer. Han understreker spesielt at han tykkjer det er bra at ein i Vågå ser moglegheitane i staden for å klage på alle problema.

Elevrådsleiar ønskjer velkomen med ei flott tale.

Underhaldning frå elevane.

Underskriving av intensjonsavtale om IKT mellom Microsoft, Intel, Atea og Vågå kommune skjedde før statsministaren kom.

Spanande jobb som musikkpedagog i Vågå

Vågå kommune har ei målsetting om å få Noregs beste skule og barnehage gjennom å ta utgangspunkt i eit heilskapleg menneskesyn med sansebasert læring. Tidleg innsats og forpliktande samarbeid med heimen er også satsingsområde i utviklingsarbeidet som skal strekke seg over fem år.

Skildring Vågå kommune søkjer no etter ein som kan medverke til å styrke arbeidet i musikkfaget i skulane og barnehagane våre og som ser moglegheitene til å bruke musikk for å nå kompetansemål i andre fag.

Vi ønskjer å tilsetje, i fyrste omgang for eitt år, ein musikkpedagog. Arbeidsoppgåvene vil mellom anna vere å leie ulike samarbeidsprosjekt mellom kulturskule, barnehage og grunnskule innanfor musikk. Personen skal vere ein samlande ressurs for å inspirere, motivere og rettleie musikklærarane i kommunen. I tillegg ser vi for oss at han/ho skal ha ansvar for undervisning, prosjekt og nye undervisningsopplegg i barnehagane og i grunnskulen.

Noko av årsverket vil truleg også kunne leggast ut som eit nytt tilbod i kulturskulen, avhengig av kva for kompetanse den vi tilsett har.

Vi ønskjer ein person som har følgjande kvalifikasjonar:
• Pedagog med musikkutdanning
• God på formidling av musikk og til å få ungane til å skape musikk sjølve
• God i møte med både unge og vaksne
• Sjølvstendig og samarbeidsorientert
• Erfaring innan dans og drama er ein styrke
• Må ha førarkort og eigen bil

Stillingsannonse og elektronisk søknadsskjema finn du ved å trykke på denne linken.

Statsminister Jens Stoltenberg kjem til Vågå!

Måndag 9.mai kjem statsminister Jens Stoltenberg til Vågå for å opne nye Vågåmo skule og for å bli orientert om Vågå kommune sin satsing på skule- og samfunnsutvikling.

Statsministaren vil kome til Vågå rett før klokka 13, og vil møte både ordførar, rektor og elevar ved Vågåmo skule. Der vil han få høyre meir om Vågå kommune sin satsing på skule og bli orientert om den nye satsinga på digitale verktøy Vågå er i gang med. Tilsette og elevar ved 3.trinn vil då demonstrere nytt utstyr. Seinare vil han mellom anna møte ordførarar i regionen, Arne Brimi og friviljugsentralen.

Vi ønskjer statsminister Jens Stoltenberg hjarteleg velkomen til Vågå!